Pathian leh Mipuite zarah Kum 2018 aṭangin Sawrkarna kan lo chelh ta a, hun khirh leh hun harsa – Covid-19 hripui leng, Ramri buai, Vawk pul hri, Lirnghing, Ram kang, Khawvel sum leh pai tlahniam, Raltlan chhawmdawl hna nen hun khirh tak kan hmachhawn a. Heng harsatna kan tawh karah hian Pathian hruainain ram leh hnam hmasawnna turin theihtawp kan chhuah zel a ni. Kum 2023 MLA inthlanpui kan lo hmachhawn leh dawn ta a. MNF-in sawrkarna kan chan leh ngei theihna turin ruahmanna leh hmachhawp kan neihte hi kan hmalakna tur leh kan ngaih pawimawh turte an ni:
POLITICAL
1. Ni 13.09.2007-a UN Declaration on the Rights of Indigenous People behchhanin Zofa/Zohnahthlak ram hrang hranga ṭhendarha awmte thuneihna sang zawk neia rorelna pakhat hnuaia awmkhawm turin hmalak chhunzawm a ni ang.
2. Kan unau State dang leh rampawna awmte tan belhtlak leh innghahna tlak ni zel tur leh Zoram hi Zofate Jerusalem ni zel turin hma kan la ang.
3. Mizote Sakhua leh Hnam Dan, Ṭawng leh Nunphung vawnghim a, chawisang zel turin hma kan la chhunzawm ang a, MNF sawrkarin a din Mizo Language Board pawh tihchangtlun zel a ni ang.
4. Kum 1986-a MNF leh India sawrkar Inremna avanga tun thlenga remna leh muanna awm zui ta hi vawn nun zel a; Peace Accord-a thudah la tihpuitlin loh awm apiang bawhzui leh tipuitling tura hmalak zel a ni ang.
5. Hnam Pasalṭha leh Martar chhungte tan an hamṭhatna tur siam chhunzawm a ni ang.
6. Ramri venhim leh humhalh hna kan chhunzawm ang a, MNF sawrkarin Boundary Committee a lo din tawh angin, ramri chingfel tura hmalakna hi chhunzawm zel a ni ang. Ramri chhehvela chengte tan hmasawnna chak taka kalpui zel a ni ang.
7. Inremna Thuthlung angin Minority-te dikna leh chanvo humhalh a ni ang a, an hamṭhatna tur leh an hmasawnna chak zawka kalpui a ni ang.
8. Inremna Thuthlung angin Border Trade tipuitling tura hmalak chhunzawm zel a ni ang.
ADMINISTRATION
1. Sawrkar Rin ngam, Langtlang, Mawhphurhna Hmachhawn ngam, Rorelna fel leh thianghlim, Thuneihna semzai phal sawrkar ṭha, mi tin Huapzo tur, Mipui Sawrkar kan din chhunzawm ang a, UN Sustainable Development Goals tihlawhtling zel tur pawhin ṭan kan la chhunzawm ang.
2. MNF Sawrkarin hlemhletna (Corruption) tibo tura a din Lok Ayukta hi chak leh zuala hnathawk turin thuamṭhat zel a ni ang.
3. Langtlang sawrkar ni zel turin, RTI Act, 2005 hi mipuite tana ṭangkai taka hman chhunzawm a ni ang.
4. Decentralization tihlawhtlin nan India Danpui Article 243 tlawhchhanin, AMC/LMC/LC/VC-te tichangtlung zelin, thuneihna tam zawk pek a ni ang a. Lunglei khawpuia LMC kan din angin, District khawpui dangah pawh a remchan dan angin Municipal Council/Board din zel a ni ang.
5. Sawrkar hnathawk lak chungchangah a thiam, tling leh phute ngei lak an nih theih nan MPSC leh MSSSB-te thuam chak zel an ni ang.
6. Tunlai thiamna, e-governance hmang ṭangkaiin mipuite tan kawng hrang hranga awlsamna thlen zui zel tum a ni ang a. Tui bill, electric bill, revenue tax, etc. online-a pek chhunzawm zel theih nan ṭanlak a ni ang.
7. Sawrkar hnathawk, New Pension Scheme hnuaia awm mekte harsatna sukiang tura hmalak mek hi chhunzawm a ni ang.
8. The Mizoram Land Revenue Act, 2013 vawi tam tak ennawn a ni tawh a; Land Reform lamah hmathar lak a ni ang a; Mipuite phurrit chhawk zangkhai turin The Mizoram Urban Areas Rent Control Act, 1974 ennawn a ni ang.
9. Contract leh Supply hna pekah a theih chin chinah ram leilung fate duhsak bik an ni ang.
10. Lirthei chhiah lak dan MNF sawrkarin a lo siamṭhat tawh angin, STA hnuaia Vehicle Replacement chungchang leh chhiah chi hrang hrang lak danah mipui phurrit lo thei ang bera kalpui zel kan tum ang.
11. Sawrkar hnathawk chi hrang hrang harsatna neite - Sipai bang, Muster Roll/Provisional Employee, CSS/Contract Employee-te hamṭhatna ngaihtuah chhunzawm zel a ni ang.
12. Assam Rifles insawn chhuak mekte an insawn chhuah vek theih nan chak zawka hmalak zel a ni ang.
EI LEH BAR ZAWNNA (ECONOMIC DEVELOPMENT)
1. Socio Economic Development Policy (SEDP) hnuaia hmalakna tur hrang hrang ruahmante kalpui chhunzawm a ni ang.
2. Kuthnathawktute ṭanpuina leh khaichhuah nan Family Oriented SEDP kalpui chhunzawm zel a ni ang.
3. Kuthnathawktute dawmkanna mai bakah, awlsam leh man man zawka an Thlaitharte an hralh theih nan sawrkarin a lei leh hralhna chungchang a buaipui (facilitate) ang a, Minimum Support Price leh Market Intervention Scheme-te hman ṭangkai a ni bawk ang.
4. Thlaithar sawngbawlna leh vawnṭhatna buatsaih tawhte tichangtlungin, Sawhthing leh thlai dangte awlsam leh man man zawka hralh thei turin sawrkarin hma a la zel ang.
5. Ṭhalaite leh mahni kutkawih leh thiam thil hmanga eizawngten eizawnna ngelnghet an neih theih nan Entrepreneurship Scheme kalpui zel a ni ang.
6. Mizoram Building & Other Construction Workers Welfare member-ten hamṭhatna tam zawk leh an chanvo dik tak an hmuh thuai theih nan hmalak chhunzawm a ni ang.
7. Thlaithar, Sa, Sangha etc. hrisel leh thianghlim ei tur kan hmuh theih nan, a zawrhna hmun changtlung zawk siam belh zel tum a ni ang.
8. Khawpui leh thingtlanga cheng SHG hmeichhiate tan eizawnna kawhhmuh leh chhawmdawl kawngah hmalak chhunzawm zel a ni ang.
HMASAWNNA RUHREL DIN (INFRASTRUCTURE)
1. Kan kawngpui neihsate hi ṭha taka enkawlin tihchangtlun chhunzawm an ni ang a, Mizoram Sawrkar leh MoRTH ten State leh National Highway an siam mek hi chak zawka kalpui a ni ang a. A theihna apiangah tui kawng (waterway) siam a ni ang.
2. Kuthnathawktute tan an huan leh ram awlsam taka an kal pawh zung zung theihna tur atan (Economic/Agricultural link road) siam belh bakah, a awmsate tihchangtlun chhunzawm zel a ni ang.
3. Thlawhna ṭumhmun (airport) kan neih mek tichangtlung zelin, Chhim lam leh hmun dang remchangah Airport kan neih theihna tura hmalakna kal mek chhunzawm a ni ang.
4. Lunglei hi tun aia khawpui pawimawh zawk ni turin hmalak a ni ang a, HPC/LMC chak zawk leh changtlung zawk, Police Southern Range, Sawrkar Office hrang hrangte tichangtlung zel tura hmalak chhunzawm a ni ang. Pukpui Mausep rama University Campus tihpuitling thuai tura hmalak zel a ni ang.
5. Kawlphetha (Hydro/Solar/Renewable Energy) siamchhuah lamah ṭanlak a ni ang a, District khawpuite Solar City/Town-ah siam tura hmalak a ni ang. Aizawl khawpui chhunga electric hrui inzam hnawkte hi mipuite him zawkna atan ABC Cable hmanga thlak vek a ni ang.
6. MNF Sawrkar laia bul lo ṭan tawh, khualzin hipna tur Tourist Resort chi hrang hrang leh ṭhalaite tan zirna Skill Institutions-te changtlung zawka thuam belh zel a ni ang.
7. Mizoram chawm zo ngei tur FCI Kudam, Sairang Dinthara sak mek te, eirawngbawlna Gas thunna lian - LPG Bottling Plant, Mualkhang-a mi tihchangtlun nan Bigha 60-a zau ram lei fel tawhte leh Petrol/Diesel dahkhawlna lian (Oil Depot) Sairang Sihhmuia ruahman mekte hi tipuitling turin chak taka hmalak a ni ang.
8. Mizorama lei hnuai hausakna haichhuak tura hmalak chhunzawm a ni ang.
9. Act East Policy-in a rawn ken kawngpui ṭha, rail-head leh sumdawnna lian lo lut avanga Mizo hnam chimrala kan awm theihna tur lakah inveng chungin theihtawpa hmalak a ni ang.
MIPUI VANTLANG HAMTHATNA
1. MLPC Act, 2014 hmangin Zu zawrh tihtawp a lo ni tawh a. Zu leh Ruihhlo bawiha tangte enkawlna Jordan Center, Seṭhawn tichangtlungin, Kohhran, NGO leh mi ṭhahnemngaite hmalakna nen ṭang tlangin, a ṭul dan ang zelin Rehabilitation Centre thar pawh din belh a ni ang.
2. HIV laka inveng turin hmalak zel a ni ang a, a kai mekte thinhrikna tibo tura hma lain, enkawlna ṭha zawk buatsaihin, ART, OST leh Care Center hrang hrang din belh a ni ang.
3. Zoram Medical College leh Damdawi In dang te, CHC, PHC leh Health Center dangte tihphuisui zel a ni ang a, Doctor leh Nurse indaih lohna sutkian zel a ni ang.
4. MNF sawrkar laia bul ṭan tawh, Mizoram State Health Care Scheme hi ADB funding hmangin changtlung zawk leh phuisui zawka kalpui a ni ang.
5. Central sawrkar pension scheme (IGNOAPS) nena ṭangkawpin changtlung zawka upaten Tar Pension an dawn theih nan hmalak a ni ang.
6. Naupang, Hmeichhia leh Pianphunga harsatna neiten an dikna chanvo an chan theih nan chak zawkin hmalak a ni ang a. Naupang dikna chanvo (MSCPCR), PwD leh Women Commission pawh tihphuisui a ni ang a, a nihna ang taka an kal theih nan a ṭul ang zelin Dan siamṭhat ni ang.
7. Chanchinthar puangzartu media hrang hrangte hmasawnna leh hamṭhatna tur ngaihtuah a ni ang a, The Mizoram Accredited Journalist Pension Scheme 2023 a hlawhtlin thuai theihna turin hmalak a ni ang.
8. Khuarel chhiatrupna avanga vanduaina tawkte tana chhawmdawlna, NDM Act, 2005 angin kalpui a ni ang.
9. Nitin mamawh - Gas, Buhfai, Tui leh Electric hnianghnar taka kan dawn chhunzawm zel theih nan hmalak a ni ang.
10. Khawpuia cheng, in hmun nei loten an neih theih nan hmalak chhunzawm a ni ang.
11. Kohhran leh NGO-te nen ṭangrualin Moral Reformation leh Zonunmawi Tlawmngaihna tlahniam zel hi chawi nung leh turin hmalak a ni ang.
ZIRNA LEH ṬHALAITE HMAKHUA
1. Kan khawtlang nun milin Sikul kai hun leh Sikul Calendar ennawn a lo ni ta a. Hnam dan leh khawtlang nun milin National Education Policy (NEP) kalpui a ni ang a, Quality Education nei ngei turin chak takin hma kan la chhunzawm ang.
2. Zirlaiten Scholarship-a harsatna an tawhte sukiang turin ṭanlak zel a ni ang a. Zirna sang zawk, Mizoram mamawh zir duhte tan Sawrkar-in remchang a zawnpui zel ang.
3. All India Service leh Central Service danga ṭhalai tam zawk an luh ve theih nan, zirna kawng hrang hrangah hmalak chhunzawm zel a ni ang.
4. MNF sawrkarin vantlang enkawl Zirna In dinhmun sang zawka a hlankai tawh leh hlankai mekte tichangtlung tura hmalakna chhunzawm zelin, Zirlaite hamṭhatna hrang hrang, residential school, smart classroom siam belh a ni ang a. Zirtirtu indaih lohna pawh siamrem zel a ni ang.
5. UGC duh dan zulzuiin State University kan neih thuai theih nan hmalak chhunzawm a ni ang a, Medical, Paramedical, Engineering, Technology leh Management zirna changtlung zawk kan neih theih nan hmalak chhunzawm a ni ang.
6. Ṭhalaite kawng hrang hranga an thiamna leh theihna tipung a, lemziak, thlalak leh film lama hmasawnna tura ruahmanna siamin, eizawn nan an hman theih turin hmalak chhunzawm a ni ang.
7. Sports kawng hrang hrangah tun aia hma kan sawn theihna atana Mizoram State Sports Policy 2019 thar kan siam hmangin hmalak a ni ang a, Infiamna hmanrua leh hmunhma bakah Infiammite hamṭhatna tam zawk ruahmansak zel an ni ang.
8. Zirlai thiam thei leh tiṭhate tan lawmman (Incentive Award) siamin, hma an sawn zel theih nan kawng kawhhmuhin ṭanpui an ni ang.
9. Zirlai, a mamawhtute tan District Headquarters leh hmun remchang dangah Hostel siam belh zel tum a ni ang.
10. Armed Battallion thar siam belh tura hmalak a ni ang a. Police 600 lakna tur sanction fel vek tawh pawh tihpuitlin thuai a ni ang.
11. Youth Oriented SEDP buatsaih a ni ang a, ṭhalai mahni kutkea eizawn tum leh ruahmanna nei thate (entrepreneurs) tan, project siama bul an ṭanna tur SEDP hnuaiah ruahmanna siam thar a ni ang.